ASÍ FOI A CONCENTRACIÓN CONTRA A VIOLENCIA DE XÉNERO

Algunas socias da asociación sosteñen a pancarta co eslogan da campaña

Máis dun centenar de persoas asistiron hoxe as oito da noite a concentración en contra da violencia de xénero que organizamos dende a Asociación de Mulleres de Camariñas pola Igualdade. O acto consistiu na lectura dun breve manisfesto por parte da presidenta da asociación, seguido dun minuto de absoluto silencio en recordo das mulleres asasinadas vítimas da violencia de xénero no que levamos de ano. Acto seguido fíxoxe unha ofrenda floral no que as persoas asistentes puxeron unha flor por cada unha das 64 vítimas deste ano ao tempo ca presidenta nomeaba as vítimas unha a unha. Despois dun sentido aplauso pechouse o acto coa soberbia actuación do Coro Municipal de Mulleres de Camariñas, que por primeira vez e en honor a causa interpretaron, traducida ó galego, a coñecida canción contra o maltrato de Amaral, "Salir corriendo".

Dende a asociación queremos agradecer a presenza de todas as persoas asistentes, por implicarse na causa e condenar públicamente a violencia de xénero. Grazas.

A presidenta lendo o manifesto

Unha flor por cada vítima

O Coro Municipal de Mulleres de Camariñas

CONCENTRACIÓN EN CONTRA DA VIOLENCIA DE XÉNERO

...

Dende a Asociación de Mulleres de Camariñas pola Igualdade queremos invitar a todas as persoas do Concello de Camariñas e da comarca a participar e condenar públicamente a situación de violencia de xénero que estamos a vivir actualmente.

Pedímoslles que “Abran os Ollos“ e recordámoslles que “O silencio é unha forma de participar na violencia”.

Mediante unha concentración que terá lugar o vindeiro xoves 25 de novembro as 20:00h. fronte a Casa da Pedra de Camariñas, queremos facer especial fincapé nos casos de violencia de xénero mais graves, por rematar en morte, facendo unha ofrenda floral polas víctimas asasinadas este ano, que a data de hoxe xa van nada menos que 63 mulleres.

Dende a asociación queremos agradecer a colaboración que nos prestan para poder levar a cabo este acto a Deputación da Coruña e o Concello de Camariñas, así como ao debuxante Rafa Navarro por concedernos o uso do debuxo dos ollos que acompaña o lema desta campaña, “Abramos os Ollos“.

GAÑADORA 1º Premio "MULLER POLA IGUALDADE" 2010 Camariñas

Divina Quiza Carril recibindo o premio de man de Dona Mª Jesús Cerdeiras e da nosa presidenta Dona Karina Vázquez Romar

O pasado sábado 1 de maio na Casa da Pedra de Camariñas, celebrouse o acto de entrega do 1º Premio "Muller pola Igualdade" 2010 de Camariñas. Das tres finalistas, todas merecedoras do premio, resultou gañadora DIVINA QUIZA CARRIL.

Foi un acto moi emotivo, no que contamos coa presenza de máis de 140 persoas, no que houbo moitas risas e bágoas de emoción. A verdade e que resultou unha verdadeira homenaxe a todas as mulleres traballadoras e loitadoras de Camariñas, en especial as finalistas e sobre todo a Gañadora.

A nosa presidenta deu un pequeno discurso de presentación, xa que este foi o noso primeiro acto público, no que falou sobre os comezos da asociación e resaltou os fins polos que loitamos e traballamos.
Despois de agradecer a colaboración do patrocinador e das empresas e entidades colaboradoras, visualizamos un pequeno video co resumo dos méritos das tres finalistas, e inmediatamente despois deuse a coñecer o nome da gañadora.

Dona Mª Jesús Cerdeiras fixo entrega do premio, como representante da empresa patrocinadora, Industrias Cerdeimar; e a nosa presidenta fixo entrega da mención de Socia Honorífica a gañadora.
O final do acto puidemos disfrutar da actuación do coro Brisas do Mar de Camariñas e de mulleres de Xaviña. Así como degustar duns pinchos de productos típicos de Camariñas, entre os que se encontraba unha variedade de Conservas Boya, empanadas e pasteliños doces e salados da Panadería Perla.

Queremos agradecer a presenza de todos os que nos acompañaron nese día, a de todas as empresas que colaboraron para que o premio puidera levarse a cabo, Industrias Cerdeimar, Diario Camariñan, Que pasa en Camelle, Distribucións Vilán, Panadería Perla e Concello de Camariñas; así como a gran axuda que tivemos por parte de Emilio Roca, profesor do instituto IES Pedra da Aguia de Camariñas, que nos axudou moitísimo coa edición do vídeo. MOITAS GRAZAS A TODOS.

As 3 finalistas, Dolores Bermúdez Rojo, Divina Quiza Carril e Ana Mª Fondo Canosa

Actuación do Coro de Mulleres de Camariñas e Xaviña

FINALISTAS 1º Premio "MULLER POLA IGUALDADE" 2010

Dende a a Asociación de Mulleres de Camariñas pola Igualdade temos o pracer de comunicarlles o nome das tres finalistas do I Premio "MULLER POLA IGUALDADE" 2010 Camariñas. No acto de entrega do premio, que terá lugar no salón de actos da Casa da Pedra en Camariñas o vindeiro sábado 1 de Maio do 2010 as 18:00 h., darase a coñecer o nome da gañadora.

As finalistas elixíronse de entre máis de 70 nominacións recibidas, polo que foi unha selección difícil, valorándose primordialmente o perfil descrito nas Bases do premio; que foran mulleres emprendedoras, loitadoras, que romperan os estereotipos da sociedade patriarcal (na casa, loitando nun traballo masculinizado...), e a súa aportación na igualdade de oportunidades a sociedade camariñá. Quedando como as tres finalistas:

-Divina Quiza Carril, unha muller que sobresaíu pola súa loita familiar, sacando adiante a cinco fillos ela soa; igualando o seu esforzo e traballo ao de calquera home ó traballar sen descanso durante todo o día e tamén pola noite en multiples traballos, a maioria deles desempeñados por homes. De día traballou nunha empresa de transporte de mercancias varias cargando e descargando os camións (sendo a maioría das mercancías moi pesadas, lavadoras, neveras, sacos de sal, caixas de bebida...), e pola noite no muelle descargando o peixe dos barcos... e nun sinfín de traballos diversos para poder ter que levarlle a boca os seu fillos.

-Dolores Bermúdez Rodríguez, presidenta da Asociación de Mariscadoras Areal de Camariñas e Vicepratroa maior da Cofradía de Pescadores de Camariñas. Muller que leva moitísimos anos loitando polos dereitos das mulleres mariscadoras, para que teñan un traballo digno e igualitario.





-Ana Mª Fondo Canosa, dona e conductora dunha empresa de transporte, Autos Fondo, foi unha das primeiras conductoras de autocares de Galicia, profesión vinculada case sempre os homes.

Invitamos a toda a cidadanía a que participe no homenaxe as finalistas asistindo o acto de entrega do premio, porque consideramos que o mellor homenaxe que lle podemos facer a todas as mulleres nominadas é compatir o premio con todos os veciños e coñecidos para darlles o noso apoio.

1º Premio "MULLER POLA IGUALDADE" 2010

A Asociación de Mulleres de Camariñas pola Igualdade, que ten como fin primordial favorecer e dinamizar o compromiso coa igualdade de oportunidades entre mulleres e homes e a loita contra a violencia de xénero así como mellorar a vida diaria das mulleres que viven no medio rural, convoca o I Premio “MULLER POLA IGUALDADE” 2010, co obxectivo de homenaxear (visibilizar) a unha muller polo seu prestixio ou por haber contribuído de modo relevante a mellorar a dignificación da figura da muller camariñá.

Bases do premio

I. Nominacións

· 1. Poderán ser nominadas veciñas de todas as parroquias do concello de Camariñas de calquera ámbito ou sector social, que a data actual non estén falecidas.

· 2. As nominacións poden ser propostas por persoas independentes ou de calquera tipo.

· 3. As nominacións pódense realizar de diversas maneiras:

a) Cubrindo a ficha de nominacións e meténdoa nas urnas dispostas para o caso, que se atoparán ubicadas en distintos sitios de todas as parroquias do concello.

b) Solicitando a ficha e devolvéndoa cuberta a seguinte dirección de correo electrónico mullercamarinas.igualdade@gmail.com
c) Cubríndoa directamente en www.diariocamarinan.com,
d) Descargando a ficha de nominacións nos seguintes blogs, o da asociación mullerespolaigualdade.blogspot.com ou no de Camelle quepasaencamelle.blogspot.com.

· 4. Valorarase como perfil das mulleres nominadas:
a) Que sexa unha muller emprendedora, loitadora...
b) Que rompera os estereotipos da sociedade patriarcal, (na casa, loitando nun taballo masculinizado...).
c) Aportación na igualdade de oportunidades a sociedade camariñá.

· 5. A prórroga das nominacións comeza o luns día 8 de marzo de 2010. Día da Muller Traballadora.

· 6. A data de peche da prórroga das nominacións será o luns 5 de abril de 2010.

II. Elección

· 7. Seleccionaranse as mulleres máis significativas según o perfil mencionado anteriormente, de entre todas as nominacións recibidas, quedando a criterio da Xunta Directiva da asociación nomear 3 ou 5 finalistas según o número e tipo de nominacións recibidas. Emitirase un comuncado de prensa co nome das finalistas e publicarase tamén nas páxinas webs arriba mencionadas.

· 8. Un xurado presidido pola presidenta da asociación, e composto por mulleres, estudará as nominacións das finalistas, de entre as cales será elixida a “Muller pola Igualdade” 2010 de Camariñas.

· 9. A decisión do xurado darase a coñecer nun acto público que terá lugar en Camariñas o 1 de maio de 2010.

· 10. A decisión do xurado será inapelable.

III. Premios

· 11. A muller elixida como “Muller pola Igualdade” 2010 de Camariñas recibirá un agasallo conmemorativo do premio e será nomeada “Socia Honorífica” da Asociación de Mulleres de Camariñas pola Igualdade.

PATROCINA:

Descarga aquí a Ficha de Nominacións e mandanosla cuberta ó e-mail da asociación do 8 de marzo ó 5 de abril de 2010.